Partia Demokratike ka reaguar pasi Sali Berisha prezantoi kandidatin e “Shtëpisë së Lirisë” për kryetar bashkie në Dibër në zgjedhjet e 6 marsit.
Sipas zyrës së shtypit të PD, sot Sali Berisha poshtëroi dibranët, duke prezantuar Premtim Kryemadhin, i cili është edhe bashkëshorti i prokurorës Belina Zeneli, e cila pak ditë më parë u shkarkua nga detyra.
PD thotë se ky kandidat, i cili është i shtëpisë së Ilirit nuk përfaqëson demokratët, por korrupsionin. Në reagim thuhet se gruaja e kandidatit të Dibrës nuk çoi para drejtësisë ministrat dhe zyrtarët e Edi Ramës që blenë dhe shantazhuan dibranët për vota.
REAGIMI I PD:
“Kandidatët e shtëpisë së Ilirit, nuk përfaqësojnë demokratët. Ata përfaqësojnë korrupsionin që po e mban peng Shqipërinë. Dibranët e dinë mirë se si gruaja e kandidatit të Shtëpisë së Ilirit, nuk çoi para drejtësisë ministrat dhe zyrtarët e Edi Ramës që blenë dhe shantazhuan dibranët për vota. Demokratët dhe qytetarët dibranë, janë poshtëruar nga Berisha&Meta, të cilët përzgjodhën si kandidat pikërisht burrin e prokurores Belina Zeneli, e cila përveç dosjes 184, nuk i ka dhënë zgjidhje ligjore 33 procedimeve penale, si dhe nuk ka kryer asnjë veprim verifikimi në lidhje me 300 kallëzime të bëra nga qytetarët dibranë, duke i lënë ata pa drejtësi për hallet e tyre. Demokratët dhe qytetarët dibranë nuk mund të pranojnë kurrë njerëz të tillë. Ata e dinë se nëse zgjedhim Berishën dhe Metën, mbajmë Ramën””, thuhet ne reagimin e PD.
